ज्यावेळेस समाजात समस्या निर्माण होतात त्यावेळेस संघटनेचा जन्म होतो. 1990 च्या कालखंडापर्यंत मराठा व बहुजन समाजाची आर्थिक , सामाजिक , शैक्षणिक स्थिती अत्यंत दयनीय होती. शिक्षणाचा अभाव आणि आर्थिक विवंचनेत असलेला समाज व्यसनाधीनतेकडे व धार्मिक कर्मकांडाकडे वळू लागला होता, स्त्रिया व्रत वैकल्ये , उपवास , परमार्थप्राप्ती व मोक्षप्राप्ती यात अडकल्या होत्या. अशा रीतीने अंधारात चाचपडत असलेल्या समाजाला मराठा सेवा संघाच्या माध्यमातून आधुनिक विचाराची चाबी मिळाली. मराठा सेवा संघाचा विज्ञानवादी , वास्तववादी , बुद्धी प्रामाण्यवादी परिवर्तनवादी नवविचार मिळाला मराठा सेवा संघाचे वक्ते , प्रबोधनकार खेड्यापाड्यावर जाऊन समाजाचे प्रबोधन करू लागले . प्रबोधन चळवळीमुळे समाजमन ढवळून निघाले. अनेक वैचारिक संघटनांना सुद्धा मराठा सेवा संघाचे विचार पटायला लागले त्यामुळे जातीय सलोखा निर्माण होऊन धार्मिक व जातीय दंगली कमी व्हायला लागल्या..
प्रेरक महामानवांचे विचार आणि मराठा सेवा संघाच्या प्रेरणादायी विचारामुळे समाज परिवर्तन घडून आले. सध्याच्या परिस्थितीत कॅडरबेस कार्यकर्त्यांची कमतरता जाणवत आहे. मराठा सेवा संघाच्या चळवळीला वाहून घेणाऱ्या कार्यकर्त्यांची फळी निर्माण झाली पाहिजे. कॅडरबेस पदाधिकारी हा संघटनेचा कणा असतो. स्वार्थी आणि संकुचित हेतू ठेवून संघटनेत सामील झालेल्या पदाधिकाऱ्यांचे आणि नवनिर्वाचित पदाधिकाऱ्यांचे कॅडर कॅम्प च्या माध्यमातून उद्बोधन व मत परिवर्तन करणे आवश्यक आहे
आज मराठा सेवा संघाचे विविध 32 कक्षाच्या माध्यमातून काम सुरू आहे. संघटनेला व संघटनेच्या विचार धारेला प्रत्यक्ष-अप्रत्यक्ष पाठबळ देणाऱ्या सर्व बांधवांना मराठा सेवा संघाच्या स्थापना दिनानिमित्त मनपूर्वक शुभेच्छा…
जय जिजाऊ
विजय बोरकर
श्री शिवाजी हायस्कूल हराळ
(मराठा सेवा संघ रिसोड)
